ኢትዮጵያዊነት ክብርና ፍቅርም ነው

12

የደቡብ አፍሪካውያን የነጻነት አባትና ከበርካታ የዓለም መሪዎችም በታጋይነታቸው፣ በፍቅር አባትነታቸውና በምህረት ሰጪነታቸው በገሃድ የሚታወቁት ኒልሴን ማንዴላ በህይወት ዘመናቸው ከተናገሯቸው አብነቶች ሁለቱን እንደሚከተለው ላስነብባችሁ፡-”የነጻነት ትግላችን የሰላም ትግል ነው” ፤ “የነጻነት ጉዟችን የማይቀለበስ ነው፣ በዚህም ጉዟችን ፍርሃትን አናስተናግድም”የሚሉትን። እነዚህን አብነቶች ለአንባቢዎቼ በአስተያየቴ መንደርደሪያነት የተጠቀምኩት ያለ ምክንያት አይደለም።

ብዙዎቻችን ዘግይቶም ቢሆን መምጣቱ እንደማይቀር ባለ ሙሉ ተስፋ ሆነን እንጠባበቅ የነበረው ለውጥ በሀገራችን ተከስቷል። ያውም የዓለምን ህዝብ በሚያስገርምና እንዲያውም ለማመን አስቸጋሪ በሆነ ሁኔታና ፍጥነት እየሄደ።ለዚህም አስገራሚ ለውጥ እያንዳንዳችን ለራሳችን ወይም በጋራ የምንሰጠው ትርጉም የተለያየ ሊሆን እንደሚችልም ይጠበቃል። መጠበቅም የነበረበት ወይም ያለበት ነውና። ከነዚህም እንደየ ፖለቲካዊ ብስለታችንና ብቃታችን እየሰጠናቸው ካሉ ትርጉሞች መካከል አዝጋሚ ለውጥ ነው፣ ጅምላ አብዮት ነው፣ ስር ነቀል አብዮት ነው፣ ጠጋኝ አብዮት ነው፣ የቀለም አብዮት ነው ወይም መነሻውም ሆነ መድረሻው የማይታወቅ ግራ የሚያጋባ ለውጥ እየሆነ ነው፣ ወዘተ … የሚሉ ይገኙባቸዋል። ምንም እንበለው ምን ብቻ ለውጡ በአጭር ጊዜ “ይሆናል ብለን ያልጠበቅነውና ያላሰብነው” መሆኑ ብዥታ የፈጠረብን ይመስላል።ይህ ብዥታ የህዝቡ ወይስ የመንግስትም!! ለማንኛውም ግን ለውጥ መጥቶልናል አሊያም “መጥቶብናል” እንበል ወይስ ግራ አጋብቶናል እንበል?! እስቲ ትንሽ ዘርዘር አድርገን እንመልከት

ለውጡን ለሀገራችንና ለወገኖቻችን ዘላቂ አብሮነት በአዎንታዊና ገንቢ መልኩ ተቀብለን ማስተናገድና መደገፍ የያንዳንዳችን ግዴታ መሆኑ ደግሞ የግድ ነው። ይህ ካልሆነ ለኢትዮጵያችንና ለህዝባችን መፃዒ ህይወት የምንሰጠው ክብርና ፍቅር በቀጣይ ትውልዶች ዘንድ አዎንታዊ ተወራራሽነት አይኖረውም። በዚህ መነሻ በብዙዎቻችን ዘንድ ኢትዮጵያዊነትን ለምን በአዎንታዊነት እንቀበለው የሚለውን ጥያቄ በግሌ ትንሽ ዘርዘር አድርጌ ምላሽ ለመስጠት ላብራራ ነውና ይከተሉኝ!

ኢትዮጵያዊነት ክብር ነው፣ ይህ ባይሆን ኖሮ እስከ ዛሬ ተከባብረን ባልኖርን ነበር። ኢትዮጵያዊነት ፍቅር ነው፣ ይህ ባይሆን ኖሮ ከሦስት ሺህ ዓመታት በላይ በአንድነትና በመዋደድ ባልኖርን ነበር። ኢትዮጵያዊነት አንድነት ነው፣ ይህ ባይሆን ኖሮ እስከ ዛሬ ተበታትነን እንጂ ተመካክረንና ተቻችለን ባልኖርን ነበር። ኢትዮጵያነት ኩራት ነው፣ ይህ ባይሆን ኖሮ ስለ ኢትዮጵያዊነት በማንኛውም የዓለም መድረክ በኩራት፣ በልበ ሙሉነትና በድፍረት ባላወራን ነበር። ኢትዮጵያዊነት ድንቅ ባህል ነው፣ ይህ ባይሆን ኖሮ እሴቶቻችንን እስከ ዛሬ እንደ ዐይናችን ብሌን ተንከባክበን ባልጠበቅንና ባላቆየን ነበር።

ኢትዮጵያዊነት ሰላም ነው፣ ይህ ባይሆን ኖሮ እስከ ዛሬ እርስ በርስ ተባልተን፣ ተዋግተንና ተጨፋጭፈን በተላለቅን ነበር። ኢትዮጵያዊነት አሸናፊነት ነው፣ ይህ ባይሆን ኖሮ በተደጋጋሚ የመጡብንን ጠላቶች ቀፎው እንደተነካበት ንብ ወጥተን፣ ጠዝጥዘንና አሳፍረን ባልመለስናቸው ነበር። ኢትዮጵያዊነት ጀግንነት ነው፣ ይህ ባይሆን ኖሮ ነፃነታችንን በአኩሪ ወኔና በውድ የህይወት መስዋዕትነት ጠብቀን በጥቁር ህዝቦች ዘንድ አርአያ ሆነን ባላቆየን ነበር። ከሁሉም በላይ ደግሞ ኢትዮጵያዊነት በምንም በማንም መተካት ወይም መለወጥ የማንችል የእናትነትና የአባትነት ፍቅርና ክብር ነው። ይህ የኔ የኢትዮጵያዊነት አጭር ትርጉም ወይም ትንታኔ ነውና የርስዎን ካከሉበት የተሟላና የገዘፈ ይሆናል የሚል እምነት አለኝ። ቀጣዩ ትውልድም ይህንኑ ያልተዛባና ያልተከለሰ ትርጉም ከኛ በአግባቡ መረዳት ያስችለዋል። ይህንን ማድረግ ደግሞ የዜግነትና የኢትዮጵያዊነትም ግዴታ ነው።

ስለ ኢትዮጵያዊነት ይህንን ትርጉም ሳቀርብ ባለፈ ታሪክ ከሚገባ በላይ መንጠልጠን ግን ብዙም አልደግፍም። ታሪክ የሰሩ ቀደምት አባቶቻችን የራሳቸውን ድርሻ በመወጣታቸው ልናከብራቸው፣ ልንወዳቸውና ልናወድሳቸውም ይገባል። ታሪክን ተውሶ ወይም ገዝቶ በማምጣት የኛ ነው ማለት አይቻልምና በሁሉም ኢትዮጵያዊ ዜጋ ዘንድ ይህ እንዲረሳም ከቶ አልፈልግም። ባለታሪኮቹን በገድላቸው እያገዘፉ መሄድንም አልጠላም፣ አከብራቸዋለሁም። ነገር ግን የዛሬው ወጣት የነገ ሀገር ተረካቢና ታሪክ ሰሪ ነውና ባለፈ ትረካ ብቻ አዕምሮው ደብዝዞ የራሱን ታሪክ ፈጣሪነት የሚዘነጋ እንዲሆን ፍላጎቴም ምኞቴም አይደለም። ወጣቱ ያለፈውን ታሪክ ሲያስታውስ እኔስ ምን ሰራሁ፣ ምንስ ይቀረኛል፣ የነማን ታሪክ ለኔ አብነት ሊሆን ይገባል ወይም ሊሆን ይችላል? … የሚሉትን ጥያቄዎች በራሱ እንዲመልስና እንዲመራመር ሰፊ ዕድል መስጠት ወይም መንገድ ማሳየት ከኛ ከሚጠበቁ የወቅቱ አንገብጋቢ አጀንዳዎች አንዱ መስሎ ይታየኛል።

በኢትዮጵያዊ ቤተሰባዊነት ዙሪያ ተከባብረን ተቻችለንና ተፈቃቅረን የኖርነውን ያህል እነዚህኑ እሴቶቻችንን ለማደፍረስና ትርጉም አልባ ለማድረግ የሚቃጡ፣ ነገር ግን የማይሳካላቸው ግለሰቦችና ቡድኖች መፈጠራቸው ዛሬ ዛሬ የአደባባይ ሚስጢር ሆኗል። ህጋዊ መብትን በህጋዊ መንገድ መጠየቅ እንዳለ ሆኖ ህገ ወጦቹ ራሳቸውን አጀግነዋል። እውነትን መናገር ወንጀለኛና የመንጋ ተጠቂ እያደረገ ነው። ከኛ በላይ ዐዋቂነት ለአሳር፣ ከኛ በላይ ፍትህ ሰጪነት ፍትህ አላዋቂነት ነው የሚሉ ቡድኖችም ተበራክተዋል። ሽማግሌ የሚመክሯቸውን፣ የኃይማኖት አባቶች የሚገስጿቸውን፣ የታሪክ ዐዋቂዎች የሚተነብዩአቸውን በአጭሩ ሰላም ፈላጊ ህብረተሰብና ወላጆች የሚለምኗቸው ተማጽኖዎች ተቀባይነት ያገኙ አይመስሉም። ሁሉም ሰው እንደ ሰለጠነው ዓለም ሁሉንም ነገር መንግሥት በጀመረው ሰላማዊና በፍቅር ሀገርን ለመገንባት ባለው ፍላጎት የሚያደርጋቸው ሙከራዎች ምናልባትም ለጊዜውም ቢሆን እንደ ፍርሃት ወይም ትኩረት አናሳነት እየተቆጠሩ ያሉ ይመስላሉ።

የዚህ ትርምስ ባለቤቶችና ስትራቴጂስቶች እነማን ናቸው ብለን ራሳችንን ብንጠይቅ የኛው “የምንላቸው ወገኖቻችን” ናቸው። እነዚህም ወገኖች ለውጡ የመጣልን ሳይሆን የመጣብን መዓት አድርገን እንድናይ ብዙ ጥረት አድርገዋል። አሁንም ልዩ ልዩ ስልቶችን በመቀየስና በመለዋወጥ ይህንኑ ጥረታቸውን አላቋረጡም፣ እንዲያውም በአንዳንድ አከባቢዎች ጉልበተኛ ስፖንሰር የተቀጠረላቸው ወይም አይናኬ ባላስልጣናት ከጎናቸው ሆነው የሚገፉ ይመስል በኢትዮጵያዊነታችን ባህል ዙሪያ ጥቁር ነጥብ ጥለው የሚያልፉ ጠባሳዎችን አኑረዋል፣ እያኖሩም ናቸው፣ እንዳይገፉበትም በርካቶች ስጋታቸውን በየመድረኩ በይፋ እየገለጹ ናቸው።

ከእኛነት ይልቅ እኔነትን አጉልተው እያዩ የሚውሉና የሚያድሩ ወሮበሎች እየበዙ መጥተዋል። አንድነት ኃይል መሆኑንና ኃይልም ደግሞ ከፈጣሪ በታች የመንግሥት መሆኑን የዘነጉ ጊዜያዊ ጥቅም ፈላጊ የጎበዝ አለቆች ተራብተዋል፣ እንደ ጅምላ ጨራሽ ኒውክለር የጦር መሣሪያ ለሁሉም የመንጋ ውሳኔ ሰጪዎች “የራሳቸውን ስርዎ መንግስት”ያቋቋሙ አስመስለዋል።

አስፈላጊ ከሆነ የሚለምኑ ካልሆነም ተጠያቂነትን በተግባር የሚያሳዩ አካላት የሉም የሚል መደምደሚያ ላይ እንደዲደርሱ አብቅቷቸዋል። በሌላ አነጋገር እነዚህን የጎበዝ አለቆች የሚያስቆማቸው ህግ እስካሁን በይፋ አላየንም የሚሉ በርካታ ናቸው። ጊዜያዊ ጥቅም ለማግኘት ሲሉ በሐሰተኛ መረጃ ስርጭትና ሞቅ ባለ የገንዘብ ጉርሻ በመደለልም በየአካባቢው በርካቶችን በማሰለፍ በሰው ህይወትና ንብረት ላይ ውድመትና ህልፈተ- ህይወት እንዲደርስ አድርገዋል። ከሁሉም በላይ ደግሞ የህሊና ጉዳትና ምን ይመጣ ይሆን ስጋት የዕለት ከዕለት ገጠመኝ ሆኗል።

ተማሪው መማሩን አቁሞ በወንድሙ ላይ ዱላና ገጀራ እንዲያነሳ፣ የህዝብን ሀብት የጠላት ሀብት አድርጎ እንዲያቃጥልና እንዲያወድም፣ ለዝንተ ዓለም አብረው የኖሩ ህዝቦች በጠላትነት እንዲፈራረጁ፣ በማወቅም ሆነ ባለማወቅ ባለፉት ዘመናት የተፈጸሙ ድርጊቶችን ወደኋላ አድብቶ በመሄድ በመቀስቀስና ቂም እንዲቋጥሩ በማድረግ አንዱ በሌላው ላይ በማያውቀው ሁኔታ ለበቀል እንዲነሳሳ የማድረግ ስልት ተጠቅመዋል።

ለውጡን ከልባቸው በመደገፍ በደስታ የተሞሉ፣ ከእስር የተፈቱ፣ ከስደት የተመለሱ፣ የሞት ፍርድ ይቅርታ የተደረገላቸው፣ የፖለቲካ ምህዳር የጠበበባቸው፣ በሀገር ውስጥም ሆነ ውጪ ሀገር የህሊና እስረኛ የሆኑ፣ ….. እነዚህን ጉዳ ጉዶች ማስቆም ባለመቻሉ ስጋት አለባቸው። በተለይም ደግሞ የህግ የበላይነት ያለመኖርና ቢኖርም ያለመከበር ያስከተላቸው መዘዞች ዜጎችን ወደ ከፍተኛ ስጋት በማስገባት ለውጡ መጣልን ወይስ መጣብን የሚል ጥያቄ እንዲያነሱ አስገድዷቸዋል።ይህ ብቻም አይደለም። ማንንም ሳያዳሉ እንደ ዜጋ እውነተኛውን ጭብጥ በአደባባይ መናገር ራስን አደጋ ላይ የሚጥል አጋጣሚ መሆኑም እየተስተዋለ ነው።

ከሁሉም በላይ የህዝብ ያልሆነውን አጀንዳ የህዝብ እያደረግን በህዝቦች መካከል ጠላትነትን ማብቀል ለማንም ለምንም የማይጠቅም ጊዜ ያለፈበት አጀንዳ መሆኑን ሁላችንም በትኩረት ልንረዳ ይገባል። ይህንኑ ሌሎችም እንዲያውቁ ካላደረግን ደግሞ እንዲህ ለህዝብ የማይጠቅሙ አጀንዳዎች እዚህም እዚያም ሰፊ መድረክ እያገኙ የሚኖረው ጠቀሜታ ጉልህ አይሆንም።

ኢትዮጵያውያን የክብር፣ የውበት፣ የፍቅር፣ የአንድነትና የአብሮነት ህብረ ቀለም ያለን ህዝቦች ነን።ይህ ህብረ ቀለም እየደመቀ እንጂ እየደበዘዘ መሄድ የለበትም። ይህ እንዲሆን ደግሞ ሁላችንም የሚበጀን ተደጋግፈንና ተመካክረን ወደኋላ መንሸራተት ሳይሆን ወደፊት መራመድ ነው። በጽሑፌ መግቢያ ላይ የጠቀስኳቸው አንጋፋው የነፃነት አባት ኔልሰን ማንዴላ ከተናገሯቸው ታሪካዊ አስተምህሮዎች መካከል አንድ ተጨማሪ አባባል ላስነብባችሁ ነው “ ጠላቶቻችን አንድ ለአንድ ወይም በቡድን እርስ በርስ ለሚያጨፋጭፍ አፓርታይድ ለባሰ ስርዓት ይዳረጋሉ ብለውን ነበር፣ እኛ ግን በውይይትና በሰጥቶ መቀበል ሰላማችንን አሰፈንን፣ ጥላቻን አስወገድን፣ ዕርቅ አወረድን፣ ጠንካራ ሀገር ጠንካራ ህዝብና መንግስት ገነባን”።

ይህ ሆኖ እያለ በኛ ነባራዊ ሁኔታ ከሚያስታርቀን ይልቅ የሚያጣላ ባለመድረክ ሆነ፣ ከባለሙያ ይልቅ ዘመን አመጣሹ ፖለቲካ ተንታኝ ሆነ፣ ልጅ የአባትን ምክርና ግሳጼ አልቀበልም አለ፣ ማመልከቻ ጻፊ ሁሉ በማህበራዊ ሚዲያ ጋዜጠኛ ሆነ፣ ማህበራዊ ሚዲያም ዕድገቱ ለለውጥና መሻሻል ሳይሆን ለነውጥ ነው ወደሚያሰኝ ደረጃ ተደረሰ፣ የስም ማጥፋትና ማስጠፋት ወንጀሎች ያለምንም ገደብ የሚሰሩበት ብቸኛ መድረክ ሆኖ ቁጭ አለ። ማህበራዊ ሚዲያው ለተጠቃሚው ቁርስ ምሣና እራትም ሆነ። የዘመቻ ኮማንድ ፖስትም ሆኖ ባለ በሌለ ነገር ደጃዝማች፣ ፊታውራሪ፣ ቀኛዝማችና እልፍኝ አስከልካይ፣ ስልጣን አስከባሪም ሆነ። ምን ይህ ብቻ አንዳንዱን ወደ ቀበሮ ጉድጓድ ወይም ሰው ሰራሽ ዋሻ ውስጥ አስገብቶ ንጹህ አየር እንዳያገኝም እንዳይወጣም አድርጓል። ታዲያ በዚህ ሁኔታ መቀጠል እንዴትና እስከ መቼ!?

ኢትዮጵያውያን የክብር፣ የውበት፣ የፍቅር፣ የአንድነትና የአብሮነት ህብረ ቀለም ያለን ህዝቦች ነን።በዚህ ክብራችንና ፍቅራችን በአንድነትና በኢትዮጵያዊነት ተደምረን እንኑር።

አዲስ ዘመን ግንቦት 10/2011

 ከወልደ አማኑኤል ጉድሶ