ኢትዮጵያ ከአዲሱ አመት ጀምሮ 500 ሺህ ምስክሮችን ብትጠራስ…!?

11

ከማይረሱና አስደሳች የህይወት አንጓዎች አንዱ ለአመታት የደከሙበትን ትምህርት አጠናቆ ግዋን ለብሶ ለምረቃ ከተደበላለቀ ስሜትና የሀሳብ ዥዋዥዌ ጋር አዳራሽ መገኘት ነው። ከዚያም የዕለቱን የክብር እንግዳዎች እና ተናጋሪ በጉጉት መጠበቅ። የፕሪስተን ዩኒቨርሲቲ የሙህራን ታሪከ ፕሮፌሰር አንተኒ ግራፍተን በዩኒቨርሲቲ የምረቃ ስነ ስርዓት ላይ ተናጋሪ መጋበዝ የቆየ ልማድ እንደሆነ ይነግሩንና ተናጋሪዎች ግን እንደ ዛሬው የሀገር መሪዎች እና ታዋቂ ሰዎች የሚበዙበት አልነበሩም ያስታውሱናል። የንግግር ክህሎታቸው ከፍ ያለ አንደበተ ርዕቱ ተማሪዎችም ይጋበዙ እንደነበር ታሪካዊ ሰነዶችን ዋቢ አድርገው ይናገራሉ። የምረቃ ስነ ስርዓት ላይ ንግግር አድራጊ እንግዳ መጋበዝ ከዩኒቨርሲቲዎች የኋላ ታሪክ ጋር አብሮ የሚወሳ ቢሆንም ዝናው በአለማችን በናኘው የአሜሪካው ሀርቫርድ ዩኒቨርሲቲ በክብር እንግድነት ተጋብዘው ለመጀመሪየ ጊዜ እ. ኤ .አ በ1642 ንግግር ያደረጉት የዛን ጊዜው የማሳቹሴትሱ ገዥ ጆን ዊንትሮፕ ነበሩ። ወደ ሀገራችን ስንመጣ ግርማዊነታቸው፣ ፕሬዝዳንት መንግስቱ፣ ጠቅላይ ሚኒስትር መለስ እና ጠቅላይ ሚኒስትር ዐብይ እና በርካታ ታዋቂ ሰዎች በዩኒቨርሲቲዎች በክብር እንግድነት በመገኘት ንግግር አድርገዋል ።

ክቡር ጠቅላይ ሚኒስትር ዐብይ አህመድ በተጠናቀቀው የትምህርት ዘመን በአዲስ አበባ ዩኒቨርሲቲ የተማሪዎች የምርቃት ስነ ስርዓት ላይ በክብር እንግድነት ተገኝተው ለመጀመሪያ ጊዜ ባስተላለፉት መልዕክት ” …በየትኛውም ጉዳይ መከራከር፣ መሟገት የሚጠበቅ ቢሆንም በሀገር ሉዓላዊነትና አንድነት ላይ ግን እንዳትደራደሩ። … የዛሬ ምሩቃን ከለውጡ ጎን ብትቆሙ በአጭር ጊዜ ሀገራችንን ወደ ተሻለ ምዕራፍ ማሸጋገር እንችላለን ። …” ብለዋል። ከ1985 ዓ ም ወዲህ በተለይ ከ97ቱ ምርጫ በኋላ የከፍተኛ ትምህርት ተቋማት የአካዳሚ ነፃነት ተደፍቆ ለአንድ ለአምስት ጥርነፋ እና ለኢህአዴጋውያን ደህንነቶችና ካድሬዎች መፈንጫ፣ መናኸሪያ በመሆኑ በተጠየቅ፣ በአመክንዮና በአብርሆት የሚሞግት፣ የሚከራከርና የሚጠይቅ ተማሪም መምህርም ማፍራት አልተቻለም። በተቃራኒው የአስገድዶ ማጥመቂያ indoctrination ሙት ባህር ሆነ ። እንደ ገሊላ ባህር ውሃ ( ህይወት ) ማስገባት ማስወጣቱን ትቶ እንደ ሙት ባሕር መቀበል ብቻ ሆነ ። የዩኒቨርሲቲው ማህበረሰብ በተለይ ሙህራንና ተማሪዎች እንደ ሙት ባህር ተቀባይ ብቻ ሆኑ። በጣት የሚቆጠሩ እንደ ዶ/ር ዳኛቸው አሰፋ፣ ፕሮፌሰር መረራ ጉዲና፣ ረዳት ፕሮፌሰር አበባው አያሌው እና ሌሎች ግን አሻፈረኝ ብለው እስከ መጨረሻው ሰዓት እንደ ገሊላ ባህር ህይወት ተቀብለው ህይወት መስጠታቸውን እንደቀጠሉበት ሳንዘነጋ። ለማንኛውም ዩኒቨርሲቲ እስትንፋሱ ማሰብ ፣ መጠየቅ ፣ መሞገት ፣ መከሰት ፣ መግለጥ ነውና ። በተቃራኒው ሞቱ ደግሞ እንደ ሙት ባህር የሰጡትን ብቻ ተቀባይ መሆን ነው ። ለውጡ ከባተ ከአለፈው አንድ አመት ከመፈንቅ ወዲህ ግን ይህ የሙት መንፈስ እያፈገፈገ ይመስላል። አጥጋቢ ባይሆንም ዩኒቨርሲቲዎቻችን በተለይ የአዲስ አበባ ዩኒቨርሲቲ በተመረጡ ሀገራዊ ርዕሰ ጉዳዮች ፈራ ተባ እያለ የውይይት መድረኮችን ማመቻቸት ጀምሯል። ልሒቃኑም በአደባባይ መሞገት መፃፍ ጀማምረዋል። ከቀሩት የመንግስትም ሆነ የግል ዩኒቨርሲቲዎችም ይህን ፈለግ ፣ ዳና መከተል ይጠበቃል።

በሀገር ፍቅርና አንድነት ዙሪያ እንዳይደራደሩ ክቡር ጠቅላይ ሚኒስትሩ ምሩቃኑን አደራ ማለታቸው ይታወሳል። በገደም ዳሜ ለእኛ ጭምር በተላለፈው በዚህ መልዕክት ሀገር ከዘር ፣ ከፓርቲ ፣ ከፖለቲካዊ አመለካከት፣ ከህይወት ፍልስፍና ፣ ወዘተ . በላይ መሆኑን አስገንዝበውናል ። በተጠናቀቀው የትምህርት ዘመን አልፎ አልፎ ካች አምናና ከዚያ በፊት ደግሞ በተደጋጋሚ በዩኒቨርሲቲዎች ታውኮ ፣ ደፍርሶ የነበረው ሰላም መነሻው ከሀገር ይልቅ ማንነትን ተገን አድርጎ በተጎነጎነ የሴራ ፖለቲካ መሆኑን ያስታውሷል ። ዛሬም የክቡር ጠቅላይ ሚኒስትር የለውጥ አጀንዳ የራስ ምታት ለሀገራችንም የጎን ውጋት ይሄው የማንነት የዘውግ ፖለቲካ ሆኖ ዘልቋል። የዚህ በሽታ መድሀኒቱ ከማንነት ኢትዮጵያዊነትን ከጎጠኝነት ሀገርን ማስቀደም ነው ።

ከክቡር ጠቅላይ ሚኒስትር የምረቃ ስነ ስርዓት ንግግር በመግቢያዬ ላይ ከተዋስኋቸው አበይት መልዕክቶች ስለ ዩኒቨርሲቲዎቻችን ጠያቂና ሞጋች መሆን አስፈላጊነት ይቺን ታህል ካልሁ ወደ ሁለተኛው መልዕክትና ሀገራዊ ጥሪን አጣምሮ ወደያዘው ሀሳብ ልለፍ ።

ጠቅላይ ሚኒስትሩ ለ9ሽህ 637 የመጀመሪያ፣ የሁለተኛ ፣ የዶክትሬትና ፒ ኤች ዲ ምሩቃን ያስተላለፉት ነገር ግን በወቅቱ ብዙ ትኩረትና ቀልብ ያልገዛው ትልቁ መልዕክት ምሩቃኑ በሙሉ ከጎናቸው፣ ለውጡን ደግፈው ቢቆሙ ተአምር መስራት እንደሚቻል ያስተላለፉት ጥሪ ነው ። ጥሪው ከተደረገበት ቦታ አውድ አንጻር ለምሩቃኑ ብቻ የተደረገ ቢመስልም ለሁሉም ኢትዮጵያዊ የተደረገ ነበር ። ኢትዮጵያ ለመላ ኢትዮጵያውያን ያቀረበችው የድረሱልኝ ጥሪ ። ዘመኑን ፣ ትውልዱን ለመዋጀት የቀረበ ጥሪ ። የማስጠንቀቂያ ድወል ጭምር ። ለውጡን ለመታደግ የቀረበ የተማፅኖ ጥሪ ። ሀገራችን ከመቼውም ጊዜ በላይ ልጆቿን ለዘላቂ ዴሞክራሲያዊ ስርዓት ፣ ለፍቅር፣ ለእርቅ ፣ ለዘላቂ ሰላም ፣ ወዘተ . እየተጣራች ነው። ይህን ጥሪ ተቀብለው እንደ ገደል ማሚቶ ሳይበርዙ ሳይከልሱ ከአፅናፍ አፅናፍ የሚያስተጋቡ ፣ የሚያስተላልፉ የቁርጥ ቀን ልጆች ያስፈልጓታል። ስለ ለውጡ የሚመሰክሩ ንፁህ ፣ ሀቀኛ ምስክሮች ያስፈልጓታል ። የክቡር ጠቅላይ ሚኒስትር ጥሪ ከ አቶ ብርሀነ መስቀል አበበ (ፒ ኤች ዲ ) በአንድ ወቅት Arts ቲቪ ” አብይ ጉዳይ ” ላይ ቀርበው እንዲህ ሲሉ ከተናገሩት ፦ “…ከክቡር ጠ/ሚ የካቢኔ አባላት በአደባባይ ወጥተው ስለ እርሳቸውም ሆነ ስለ ለውጡ በልበ ሙሉነት የሚመሰክር ፣ ጥብቅና የሚቆም ፣ የሚሞግት የለም ። ሁሉም የቢሮ ስራ የሚሰሩ ፋይል ገፊ ናቸው ። …” ካሉት ጋር መገጣጠም ለፁሑፌ መነሻ እንደሆነኝ መግለፅ እፈልጋለሁ። ከሀገርና ከሕዝብ ጥቅም ይልቅ ፖለቲካዊ ግባቸውን ከሚያስቀድሙ ፓርቲዎች ፣ በማንነት ስም ከሚነግዱ ፣ በአክትቪስት ስም ስውር ደባን ከሚለፍፉ ወይም ከነፈሰው ጋር ከሚነፍሱ ልሒቃን፣ ከአስመሳዮች፣ ከአድርባዮች ወዘተ . የተገኘ ቃል አጥንተው የሚመሰክሩ ሀሰተኛ ፣ አስመሳይና አባይ ምስክሮችን ሳይሆን በዚህ የጭንቅ የጥብ ሰዓት ሀገራችን ከምንጊዜውም በላይ እውነትን ፣ ፍቅርን ፣ እርቅን ፣ ሰላምን ፣ ወዘተ … በልባቸው በግንባራቸው አትመው በአደባባይ የሚመሰክሩ የቁርጥ ቀን ልጆች ያስፈልጓታል።

በታላቁ መፅሐፍ ዮሐንስ ራእይ ላይ እንደተመለከተው ፈጣሪ ከእስራኤል 12ቱ ነገዶች ከእያንዳንዳቸው 12ሺህ፣ 12ሺህ በድምሩ 144ሺህ ምስክሮችን ያለልዩነት እንዳስነሳው ሁሉ በሀገራችንም ከአዲሱ አመት ጀምሮ ስለ አንድነት ፣ ስለ ፍቅር ፣ ስለ መነጋገር ፣ ስለ መደማመጥ፣ ስለ መቀባበል ፣ ስለ ይቅርታ ፣ ስለ ሰላም ፣ ወዘተ በድፍረት በልበ ሙሉነት በአደባባይ የሚመሰክሩ የቁርጥ ቀን ልጆች ያስፈልጋሉ ። በሀገራችን ምን ያህል ነገዶች፣ ጎሳዎች እንዳሉ እያንዳንዳቸው ያላቸውን የሕዝብ ብዛትም የሚገልፅ ወቅታዊና ይፋዊ መረጃ ባይኖርም 10ሺህና ከዚያ በላይ የሕዝብ ብዛት ያላቸው ነገዶች፣ ጎሳዎች ቁጥር 50 ቢሆን እና ከየእያንዳንዱ ነገድ ፣ ጎሳ ለምስክርነት የሚበቁት 10ሺህ ዜጎች ቢኖሩ 500ሺህ ምስክሮችን ማብቃት ይቻላል ማለት ነው። የሀገራችን የሕዝብ ብዛት 100ሚሊዮን ነው ብለን በመቶኛ ብናሰላው 0.5 በመቶ ማለት ነው ። እንደ አስፈላጊነቱ ሰፊ የቆዳ ስፋትና ከፍተኛ የሕዝብ ብዛት ያላቸው ነገዶች ፣ ጎሳዎች ከፍ ያለ ቁጥር ያላቸውን ምስክሮች ሊጠሩ ይችላሉ። ሆኖም ኮሽ ባለ ቁጥር የማይበረግጉ ፣ በአክቲቪስት ተብዬዎች ተነሱ ሲባሉ የማይነሱ ተቀመጡ ሲባሉ የማይቀመጡ ፣ ዘውጌአዊ ሚዲያዎች ፉከራ ሽለላ ቀረርቶ ፣ ወዘተ . ልባቸው የማይሸፍት ፣ ንፋስ ሲጎበኘው ደንገላስ እንደሚመታ ሰብል የማይሆኑ ፣ የማያወላውሉ፣ ” አቧራ በማስነሳት ሳይሆን አሻራ በማኖር ” የሚያምኑ፣ ወዘተ . አርዓያነት ያላቸው ዜጎች መሆን አለባቸው ።

ከእስራኤል ነገዶች የተመረጡ 144ሺህ ምስክሮች ለምስክርነት ወደ አደባባይ እንደተመሙ ሁሉ በክቡር ጠቅላይ ሚኒስትር ከሚመራው የለውጥ ኃይል ለዴሞክራሲያዊ ስርዓት ግንባታ የማይናወጥ አቋም እንዳለው እንዲሁም በኢትዮጵያ ሉዓላዊ አንድነት ላይ ፅኑና የማይናወጥ አቋም እንዳለው የገባውን ቃል ኪዳን በአዲስ አመት እንዲያድስ በታላቅ አክብሮት እጠይቃለሁ። በማስከተል ምስክሮች ያለ ምንም ልዩነት በአንድ ድምፅ በሁሉም የሀገራችን መልካዎች፣ መስኮች፣ ሸለቆዎች፣ ኮረብታዎች፣ ተራሮች፣ ቁልቁለቶች ፣ ወዘተ. ክቡራንና ክቡራት አንባቢያን በቀጣይ የምታዳብሩት፣ የምትጨምሩበት ሆኖ የለውጥ ሰራዊቱ ወይም ምስክሮች ስለሚከተሉት የጋራ እውነቶች ለመላ ኢትዮጵያውያን እንዲመሰክሩ እንደ አንድ ሀገር ወዳድ ዜጋ በአክብሮት እለምናለሁ።

1ኛ.ካለፈው አንድ አመት ከመንፈቅ ወዲህ እውን የሆነው ለውጥ የሚገባን እና የሚዋጀን ከመሆኑ ባሻገር ከእነ አባጣ ጎባጣው ወደ ተራራው ወደ ከፍታው የሚያደርሰን ብቸኛና አቋራጭ መንገድ መሆኑን መመስከር ።

2ኛ . አንዳይነትነት ሳይሆን አንድነት ከልዩነት ይልቅ ለሀገራችንና ለሕዝባችን የሚያተርፍ የሚበጅ መሆኑን መመስከር ።

3ኛ.የዴሞክራሲያዊ ስርዓት ግንባታ ለዜጎች እኩልነት፣ ፍትሐዊ ተጠቃሚነት፣ ነፃነት፣ ወዘተ . የማዕዘን ድንጋይ እንደሆነ እና ለሰው ልጆች ተፈጥሮአዊ ስጦታ መሆኑን በልበ ሙሉነት መመስከር ።

4ኛ. ሕዝብ በተለይ የነገ ሀገር ተረካቢ ወጣት የጥላቻ ፕሮፓጋንዳ ፣ የሴራ ፖለቲካ ፣ የሀሰተኛ መረጃ ሰለባ እንዳይሆን በሰከነ መንፈስ እውነትን እና እውነትን እንዲፈትሽ መመስከር ።

5ኛ.ተቀራርቦ በመነጋገር ፣በመደማመጥ፣ በመቀባበል እርቅን ሰላምን ማውረድና በፍቅር ስለመሻገር ለወገን መመስከር ።

6ኛ.ኢትዮጵያዊነት ከዘውግ ከማንነት በላይ እና የመደመር እሳቤ የማዕዘን ድንጋይ መሆኑን መመስከር ።

7ኛ.ትውልድ የታሪክ እስረኛ ሳይሆን የመጭው ዘመን አብሪ ኮከብ ስለመሆን ራሱን ከወዲሁ ማዘጋጀት

መመስከር ።

8ኛ.ብልቶቻችን እርስ በእርስ ካልተንሰላሰሉ፣ ካልተናበቡ ፣ ካልተጋገዙ ቆመን መሄድ እነሱም ጤነኛ መሆን እንደማይችሉት ሁሉ እኛ በዘመነ ሉላዊነት ካልተደማመርን ይሄን ፈታኝ ዘመን መሻገር እንደማንችል መመስከር ።

9ኛ.ዜጎች በተለይ ወጣቶች ጥያቄ ፣ቅሬታ ሲኖራቸው ነገ እነሱ የሚረከቡትን ሀብት ከማውደም ኢኮኖሚውን ሽባ ከማድረግ ይልቅ ማንኛውንም ጥያቄ በሰለጠነ መንገድ እንዲያቀርቡ መመስከር ።

10ኛ . ልዩነትን በኃይል ለመፍታት ከመሞከር ይልቅ በዛፍ ጥላ ስር ፣ በጠረጴዛ ዙሪያ በሰላማዊ ውይይት መፍታት ሰው የመሆን መለያ መሆኑን መመስከር ።

11ኛ.በ21ኛው መቶ ክፍለ ዘመን ጀግንነት አልሞ በጥይት በፈጣሪ አምሳል የተፈጠረን ሰው ግንባር መፈርከስ ሳይሆን በአመክንዮ ፣ በተጠየቅ ፣ በአብርሆት ፣ ወዘተ . ሞግቶ ፣ ተከራክሮ ማሸነፍ መሆኑን መመስከር ።

12ኛ . በዚህ ሙግት የተረታ፣ የተሸነፈ ቢኖር ሀሳቡ እንጂ የሀሳቡ ባለቤት የሆነው ድርጅት አልያም ብሔር አለመሆኑን መመስከር ። ወዘተ …

እንደ ማሰሪያ

ሶስቱ አብርሀማዊ እምነቶች ማለትም ክርስትና፣ እስልምና እና አይሁድ ከአፅናፍ አፅናፍ ሊስፋፉ ቢሊዮን ተከታዮችን ሊያፈሩ የቻሉት በደቀ መዛሙርት፣ በሐዋርያትና በተከታዮቻቸው ምስክርነት ነው ። የሒንዱ፣ የቡድሀ ፣ የሺንዙ ፣ የኮንፊሺየስ ፣ወዘተ እምነቶችና ፍልስፍናዎች ዕድገትም ሆነ ውድቀት ከዚሁ የተለየ አይደለም። ወደ ፖለቲካው ስንመጣጣም የማህተመ ጋንዲ ሰላማዊ ትግል የእንግሊዝን ቅኝ ገዥ ከሕንዳውያን ትክሻ አሽቀንጥሮ መጣል የተቻለው በደቀ መዛሙርታቸው አማካኝነት የየአንዳንዱ ሕንድ ልብ ማሸነፍ በመቻላቸው ነው ። የኔልሰን ማንዴላ የፀረ አፓርታይድ ትግል ፣ የአፍሪካውያን የፀረ ቅኝ ግዛት ተጋድሎ ፣ የማርቲን ሉተር ኪንግ የፀረ ዘረኝነት ትግል ፣ ወዘተ . ለድል ለፍሬ የበቁት ባፈሯቸው ተከታዮች ፣ ደቀ መዛሙርት በመታገዝ መሆኑ ታሪክ ሰንዶ አቆይቶናል። የ1ኛውንና የ2ኛውን የአለም ጦርነቶችም ሆኖ ሌሎች ጦርነቶች በአሸናፊነት የተደመደሙት ተከታይን አሳምኖ ከጎን በማሰለፍ ነው ። የቀዝቃዛው የአለም ጦርነት በምዕራባውያን አሸናፊነት የተጠናቀቀው በተመሳሳይ ምክንያት ነው ።

ስለሆነም በሀገራችን የተጀመረው ለውጥ ገዥ ሀሳብ ከፍ ሲልም አሸናፊ ሆኖ እንዲወጣ በለውጡ መሰረታውያን ሀሳቦች ዙሪያ ማለትም በዴሞክራሲ፣ በፍትሕ ፣ በእኩልነት ፣ በነፃነት ፣ በመደመር ፅንሰ ሀሳብ፣በእድገትና ብልፅግና ፣ በሰዕባዊ መብቶች መከበር፣ በፍቅር ፣ በሰላም ፣ በእርቅ ፣ በሕግ የበላይነት ፣ ወዘተ . እልፍ አእላፍ ተከታዮችን ፣ ምስክሮችን ማፍራት ይገባል። እነዚህ ተከታዮችን፣ የለውጥ ሰራዊቶችን ፣ የለውጥ አምባሳደሮችን ፣ ወዘተ . ከጎጥ እስከ ፌደራል ማደራጀት ያስፈልጋል። ይህ አንድን የፖለቲካ ፓርቲ አልያም መሪ ለመደገፍ የሚደረግ እንቅስቃሴ ሳይሆን ለውጡ እንዳይቀለበስ በማድረግ የሀገርን ህልውና የማስቀጠል ህልም ነው ። ምክንያቱም ይህን ታሪካዊ አጋጣሚ በማስተዋል በጥበብ ካልተጠቀምንበት ለውጡም ከእጃችን ካመለጠ ዳግመኛ መልሰን እናገኘዋለን ብዬ አላምንም ። ስለሆነም በምንም ሁኔታ ወደ ጨለማው ዘመን ልንመለስ አይገባም ።

እዚህም እዚያም በተስተዋሉ የሕግ የበላይነት ክፍተቶች፣ ለውጡን አስመልክቶ ወጥና ከላይ እስከ ታች የሕዝብ ግንኙነትና የአኽዝቦት ስራ አለመሰራቱ፣ ገዥውን ፓርቲ ጨምሮ አንዳንድ የተቃዋሚዎች የአክራሪ አክቲቪስቶችን ግንባር ከመመልከት አልፈው ተልዕኮ ተቀባይ መሆናቸው፣ የገዥው ፓርቲ አባል ድርጅቶች ለምርጫ ሲሉ ከሀገር ክልላዊ አጀንዳን ወደፊት ለማምጣት መሞከራቸው እና የሴራ ፖለቲካ በአናቱ ተጨምሮ ለውጡ እንደ አጀማመሩ መራመድ ተስኖታል። ስለሆነም የለውጡ ባለድርሻ አካለት ከፍ ብለው የተዘረዘሩ ድክመቶችን እና ሌሎችን ውስንነቶችን በባለቤትነት በመውሰድ ነገ ዛሬ ሳይሉ በማያዳግም ሁኔታ በመፍታት የለውጡን ምስክሮች ፈተና ሊያቃልሉ ይገባል።

ወቅቱ ሀገርን ከውድቀት ፣ ከቀውስ የምንታደግበት እንጂ ለውርስ እና ባለቤትነት የምንሻማበት ስላልሆነ ማንኛውም አግባብነት ያለው የመንግስት ተቋም ሆነ የግል ድርጅት ይህን ሀሳብ አሻሽሎ አዳብሮ ሊተገብረው እንደሚችል መግለፅ እወዳለሁ።

ይህ ዓምድ በተለያዩ ፖለቲካዊ ኢኮኖሚያዊና ማኅበራዊ ጉዳዮች ዙሪያ ዜጎች ነፃ አስተያየታቸውን የሚሰጡበት ነው። በዓምዱ ላይ የሚወጡ ጽሑፎች የዝግጅት ክፍሉን አቋም አያመለክቱም።

አዲስ ዘመን ቅዳሜ ጳጉሜ 2/2011

 በቁምላቸው አበበ ይማም (ሞሼ ዳይን )